Umboðsmaður hefur óskað eftir upplýsingum frá úrskurðarnefnd um upplýsingamál um stöðu og fjölda mála hjá henni. Meðalmálsmeðferðartími nefndarinnar hefur ekki verið lengri í átta ár og úrskurðum hefur einnig fækkað töluvert undanfarin ár.
Fylgst hefur verið með afgreiðslutíma nefndarinnar allt frá árinu 2011 og forsætisráðherra verið bent á annmarka þar að lútandi sem bæta þyrfti úr. Á undanförnum misserum hafa borist bæði kvartanir og ábendingar vegna afgreiðslutíma nefndarinnar auk þess sem málshraða hennar hefur borið á góma víðar. Í skýrslu frá forsætisráðherra um störf nefndarinnar á síðasta ári kemur fram að hún hafi kveðið upp 46 úrskurði í fyrra sem er umtalsvert minna en undanfarin ár, þar sem t.a.m. 102 voru kveðnir upp árið 2020. Þá var meðalmálsmeðferðartíminn, frá kæru til úrskurðar, 241 dagur á síðasta ári og hefur ekki verið lengri frá árinu 2016.
Nú er beðið um upplýsingar um fjölda mála sem hafa borist nefndinni á þessu ári, hve mörg hafa verið afgreidd sem og hvenær þau bárust. Einnig um heildarfjölda ólokinna mála og hvenær þau bárust. Þá er óskað skýringa á því að úrskurðum hafi fækkað og málsmeðferðartími nefndarinnar lengst á undanförnum árum. Beðið er um svör fyrir 27. júní nk.
Bréf umboðsmanns til úrskurðarnefndar um upplýsingamál