A kvartaði yfir félagsþjónustu Reykjavíkurborgar og málsmeðferð hennar í tengslum við umleitanir hans um fjárhagsaðstoð og úthlutun félagslegs leiguhúsnæðis.
Þar sem ekki varð ráðið að endanleg niðurstaða borgarinnar í málinu lægi fyrir voru ekki uppfyllt skilyrði til að umboðsmaður fjallaði um kvörtunina að svo stöddu.
Umboðsmaður lauk málinu með bréfi 24. apríl 2026.
Vísað er til kvörtunar þinnar 25. febrúar sl. sem ráðið verður að beinist að félagþjónustu Reykjavíkurborgar. Hef ég skilið kvörtunina á þá leið að þú gerir athugasemdir við að borgin hafi ekki úthlutað þér félagslegu leiguhúsnæði og það kunni að stafa af kerfislægri mismunun á grundvelli þjóðernis við úthlutun húsnæðis. Þessu tengt hefur mér jafnframt borist afrit af tölvupósti þínum 21. apríl sl. til borgarráðs og velferðarsvið borgarinnar þar sem fundið er að málsmeðferð félagsþjónustu hennar, bæði í tengslum við úthlutun húsnæðis og fjárhagsaðstoð.
Af símtali þínu við starfsmann minn 10. mars sl. verður ráðið að Reykjavíkurborg hafi enn ekki tekið umsókn þína um úthlutun félagslegs húsnæðis til efnislegrar umfjöllunar. Í því sambandi nefndir þú meðal annars að samskipti þín við starfsmenn borgarinnar í tengslum við framlagningu umsóknarinnar hefðu almennt gengið erfiðlega.
Líkt og fram kom af hálfu starfsmanns míns í fyrrgreindu samtali er gert ráð fyrir því í reglum Reykjavíkurborgar nr. 465/2019, um félagslegt leiguhúsnæði, að sótt sé um félagslegt leiguhúsnæði á heimasíðu Reykjavíkurborgar eða á þjónustumiðstöðvum Reykjavíkurborgar. Umsókn skal undirrituð á sérstakt umsóknareyðublað eða staðfest með rafrænum skilríkjum af hálfu umsækjanda eða eftir atvikum lögráðamanni, umboðsmanni eða persónulegum talsmanni hans. Samkvæmt reglunum er unnt að bera synjun Reykjavíkurborgar á umsókn um félagslegt húsnæði undir áfrýjunarnefnd velferðarráðs Reykjavíkurborgar innan fjögurra vikna frá því að umsækjanda barst vitneskja um ákvörðunina, sbr. 2. mgr. 38. gr. Ákvörðun áfrýjunarnefndarinnar má svo kæra til úrskurðarnefndar velferðarmála innan þriggja mánaða frá því að umsækjanda var kunngerð ákvörðunin, sbr. 39. gr. reglnanna og 6. gr. laga nr. 40/1991, um félagsþjónustu sveitarfélaga. Hið sama á við um ákvarðanir borgarinnar vegna umsókna um fjárhagsaðstoð.
Ástæða þess að þetta er rakið er sú, að mér er ekki fært að taka kvörtun til meðferðar fyrr en endanleg niðurstaða stjórnvalds í tilteknu máli liggur fyrir. Þetta skilyrði má leiða af 3. mgr. 6. gr. laga nr. 85/1997, um umboðsmann Alþingis, en þar segir að ef skjóta má máli til æðra stjórnvalds er ekki unnt að kvarta til umboðsmanns fyrr en æðra stjórnvaldið hefur fellt úrskurð sinn í málinu. Að baki ákvæðinu búa þau sjónarmið að stjórnvöld skuli fá tækifæri til að leiðrétta ákvarðanir eða aðrar athafnir sem eru mögulega ekki í samræmi við lög áður en leitað er til aðila utan stjórnkerfis þeirra með kvartanir.
Þar sem ganga verður út frá því að Reykjavíkurborg hafi enn ekki tekið ákvörðun í máli þínu er ljóst að kæruleiðir samkvæmt framangreindu hafa ekki verið tæmdar og skilyrði 3. mgr. 6. gr. laga nr. 85/1997 því ekki uppfyllt. Mér er því ekki fært að taka kvörtun þína til nánari athugunar að svo stöddu og lýk ég því athugun minni á henni, sbr. 1. mgr. 10. gr. laga nr. 85/1997. Fari svo að þú beinir umsókn þinni í þann farveg sem gerð er grein fyrir hér að framan, og að fenginni endanlegri niðurstöðu í málinu, er þér velkomið að leita til mín að nýju með kvörtun, teljir þú tilefni til.